سامحونى وأعذرونى

الشاعر عبد الحميد بدوى

سامحونى وأعذرونى
أنا مش قادر أفهم يعنى

فيلم مسيىء للرسول
هو فيه حد يقدر يسيىء للرسول ؟؟

أنتم فين يا اصحاب العقول ؟؟
طب هما فين دول وفين الرسول
وكدا أو كدا دول شوية بهايم وعجول
ما يستهلوش الرد والرد يطول
هما يعرفوا اية عن الرسول

أنا شايف الاساءة مننا أحنا
أحنا اللى ارتحنا وريحنا
وبنستوردوا منهم هدمتنا ولقمتنا وسلاحنا
دا أحنا حتى بنستوردوا منهم كمان احزنا وافرحنا
دا أحنا من ظلمنا لنفسنا أندبحنا
دا أحنا مستنين المعونة والقروض
عشان تداوى جراحنا
أعذرونى وسامحونى
أنا شايف الاساءة مننا أحنا
أحنا اللى من كتر الكدب بقينا نصدقوا نفسنا
أحنا اللى مفيش حد فى العالم يعرف ينافق زينا
أحنا اللى الواسطة عندنا اهم من اهم قانون
احنا اللى الغش عندنا عشان راحة الزبون
أحنا اللى مقضينها نوم فى نوم
والعالم سبقنا بميت سنه
طيب دا مش اساءة للرسول
أحنا اللى مات من سنين حلمنا
أحنا اللى وجودنا زى عدمه
ويمكن كمان عدمه أحسن مننا
أحنا اللى كل يوم لازم يتحرق دمنا
جايين دلوقتى عاملين رجالة
وحالتنا حالة
اقولكم اية اية حاجة من نفسنا

نفسى نتعلموا حتى لما نغضبوا
ازاى نغضبوا
احنا نغضبوا على حالنا الاول
وبعدين نتكلموا ونصرخوا
احنا طالما حالنا على دا الحال
مش من حقنا ننطقوا
سؤال لازم نسالوه لنفسنا
هو حد يقدر يسيىء للرسول
فرحنا فينا عدونا
بنهاجموا السفارة
والسفارة على ارضنا
هى صحيح سفارة امريكية
ولكنها ملكنا
عايزين تقتلوا السفير
اقتلوه
بس ياترى بعد ما تقتلوه
يبقى انتقمنا وانتصرنا للرسول ولنفسنا
ونبقوا خدنا حقنا
انا عايز اعرف فين عقلنا
انتم فين يا اصحاب العقول

طيب واللى بيحصل فى سوريا يا مسلمين
يا موحدين يرضى مين يرضى الرسول
أنتم فين من الرسول
أنتم فين يا اصحاب العقول
ما تتكلموا