من كتر ما بنتكلم عن حقوق الست وقهر المجتمع للست وخصوصا لو مطلقه وازاي الناس اللي حواليا بيعاملوها علي إنها " خرج بيت" أو علبة زبادي مفتوحه أو كأنها سلعه مستعمله وازاي الستات اللي حواليها بدل ما يواسوها بيخافوا منها كأنها وباء هتخطف أجوازهم وهتحسدهم، وازاي الأمهات المصريه بتشهق لو ابنها قالهاعايز اتجوز واحده مطلقه وتقوله "هار أسود عايز أول بختك تبقي مطلقه يابني" كل ده بنتكلم فيه القهر المعنوي اللي بيحصل للست المطلقه
بس كمان الراجل المطلق في مجتمعنا حياته مش وردي الصراحه طبعا حالته أفضل لأنه راجل في مجتمع ذكوري لكن مش أفضل كتير
خدت بالي من الموضوع ده لما صديقه مقربه ليا اتقدملها راجل مطلق وعنده ابن عايش مع مامته
ولأننا أصحاب جدا البنت حكيتلي كل اللي دار في دماغها ودماغ أهلها بصراحه واللي عمرهم ما هيقولوه لحد بشكل علني ولا للعريس نفسه ..
-هو عاجبك؟ هتوافقي عليه؟
-بصراحه هو عاجبني وشكله وسنه وثقافته مناسبين وشغلته كويسه، مرتبه كويس يقدر يوفرلي حياه كويسه لو كنت مراته الأولي ولو مكنش مطلق وعنده ابن
-مش فاهمه ايه علاقه انه مطلق بحياتك معاه؟
- مطلق وعنده ابن يعني بيدفع نفقه ١/٣ مرتبه تقريبا ده لو ماشي عالقانون لكن لو بيحب ابنه زياده بقي أكيد بيصرف عليه معظم مرتبه، ده غير إن مراته أم حاضنه يعني خدت الشقه اللي كانوا متجوزين فيها، يعني لو هو مستواه متوسط مش هيقدر يعيشني في شقه تمليك زي الأولانيه، وهيضطر يا ياخد شقه أصغر يا شقه إيجار وأبقي حياتي علي كف عفريت ومش مستقره، وكمان لو حصل أي مشاكل بينا وطلقني أنا كمان مش هيبقي في أي حاجه تأمنلي مستقبلي ولا هيبقي ليا أي حقوق زي الأولانيه ماهو مش هيعد يوزع شقق يعني ! أكيد طالما اتلسع في الأول هيطلع همه عليا أنا وكمان مين مستواه يسمح بكده أصلا إلا لو كان غني بقي! وكمان احتمال يكون فيه عيوب أنا معرفهاش ولسي مكتشفتهاش وتكون هي السبب في طلاقه وفي الحاله دي هبقي أنا اللي خسرانه أكتر ما لو اتجوزت واحد أنا أول زوجه ليه وحتي لو فيه نفس العيوب هبقي ضامنه حقوقي الماديه عالأقل في حاله الطلاق !
.jpg)
