كن مع الثورة

كتبت : فاطمه رمضان

كن مع الثورة، كن مع حقوق العمال: وقفة احتجاجية لعمال بتروجيت أمام وزير القوي العاملة، وعمال كابو أمام مديرية القوي العاملة بالأسكندرية

عمال بتروجيت مفصولين من قبل 25 يناير، وما خلوش حد ألا لما راحوا له سواء وقت حكم المجلس العسكري، أو وقت حكم مرسي، راحو لكل أعضاء مجالس الشعب والشوري الآخوان وغيرهم، اعتصموا أمام مجلس الشعب، ومسكوا الضابط الل كان بيحرضهم علي حرق المجلس وبيقول أنه عامل من بتروجيت، ولما فتشوه لقوا في جيبه كارنية الأمن، وقفوا قبل كل ده أمام وزارة البترول وكانوا أول عمال يتحاكموا عسكرياً علي يد المجلس العسكري بعد الثورة.

كان عندهم أمل أنهم أول لما ييجي وزير قوي عاملة منهم وعارف مشكلتهم يحل المشكلة، ويرجعهم للشغل، خصوصاً أنهم طرحين حلول كثير وما حدث يا بيسمع ولا بيعمل لهم حاجة.

علشان كده قرروا أنهم هيروحوا يقفوا بكره قدام قطاع الهجرة بالمهندسين علشان يحيو قضيتهم، ويطالبوا بحقهم في العمل.

عمال كابوا اللي ما بيقبضوش بقالهم شهور، وعاوزين الشركة تشتغل ويشتغلوا ويقبضوا، رئيس مجلس الإدارة عمرو الشرنوبي قرر أنه ينتقم من 11 من قيادات العمال (ضمنهم 3 عاملات جدعان)، من اللي بيقفوا له علشان مرتباتهم مرتبات زملائهم، علشان في الوقت اللي الناس ما بتاخدشي فيها مرتبات بيزودوا اشتراك الأتوبيس اللي بيودي الناس الشغل واشتراك الحضانة.

السيد عمرو الشرنوبي قرر أنه ينتقم منهم فيفصلهم عارفين أمته يوم وقفة عيد الفطر، قرر بالإضافة أنه حرمهم من مرتباتهم وحرم ولادهم من فرحة العيد، كمان أنه يفصلهم، كل ده علي مرآي ومسمع من الحكومة الثورية التي لم يتحرك أي منهم ويقول لعمرو أو ساويرس، أو أي رجل أعمال أحنا في دولة والعمال لهم حقوق وأنت مش من حقك تفصل العمال تعسفي. بالذمة دي تبقي حكومة ثورة؟؟؟؟؟؟؟؟؟؟؟؟؟!!!!!!

عشان كده عمال كابوا رايحين بكره جزئ منهم يقف قدام مديرية القوي العاملة بالأسكندرية يطالبونها بالقيام بدورها في عودة زملائهم للعمل، والباقي معتصمين بالشركة.

تفتكروا إرادة نجاح وأيمان، وعيشة أبو صمادة وعمال فرج الله، وعمال مساهمة البحيرة، وعمال بتروجيت اللي عاوزين يبنوا مصر هي الأقوي ولا إرادة شوية هليبة عاوزين يوقوفا المصانع ويمصوا دم العمال هي الأقوي؟؟

كن مع الثورة......كن مع كل عمال مصر....كن مع عمال كابو وبتروجيت وكل العمال المفصولين من أجل عودتهم للعمل.

للاتصال بعمال بتروجيت: 01204844478أو 01009919400أو 01280222763

للاتصال بعمال كابو 0128638906 أو 01229928699

قطاع الهجرة 96 شارع أحمد عرابي المهندسين- مديرية القوي العاملة والهجرة

بالأسكندرية بسموحة خلف محطة القطار بجوار مكتب البريد