وحياة طهر ترابك

‎‎

علاء الدين هدهد

ماتبقيش بخيلةطلعى الشمس المستخبية تحت رموشك
اوعى شيء فى الكون يحوشك
تضحكى ونضحك معاكى
تفرحى يزهزه ضياكى
تمسحى بطيبة حنانك وجه دنيتنا اللى باكى
وايه كمان
ترسمى الفرحة تغطى سطح بيتنا والجيران
تزرعى البسمة سنابل فى الجناين والغيطان
تمنحى الامن ننام احلامنا يحرسها الامان
ماتبقيش بخيلة
ماتبقيش عليلة
قدراتك والله ماهياش قليلة
دانتى فى ايديك كتير مليون حيلة وحيلة
خلينا نرجع نجمع شمل اسرتنا فى عيلة
ترجع البيبان تفتح
نفرش السجاد نجيلة
نزرع الصحرا جنينة
ادينا حلم لبكرة قبل مايضيع من ايدينا
فتشى بين الولاد ع اللى مالهوش أصل زينة
ابن الحرام واللئام واللى مارعاش الرب فينا
واللى استباح دمنا واستقوى باعداءنا علينا
اضربى بايدين قوية
لاجل تبقى النصرة جية تملى فرحتنا عينينا 
افرزينا ...ميزينا
لاجل حتى تنقذينا
راح نصبر مع جنودنا لو حتى بالصبر اكتوينا
كل عهودنا يا امى باخلاصنا راح نوفى 
دمنا يضمنا 
والشهادة على ترابك هى اسمى امانينا
كلنا فداكى يا مّا
فدا حبة من ترابك 
فدا دمعة من عينيكى
فدا كل جندى واقف مانح حياته لينا وليكى
كلنا صابرين معاكى ومهما طال الصبر بينا
بس قصاد صبرنا يبقى بكرة معاكى لينا
وحياة عيونك ياغالية
وحياة نيلك اللى دمانا بيجرى فيها
وحياة طهر ترابك كحلة عيونا وغليها
وحياة زهرة شبابنا 
اللى ف جناين الوفاء قدم عطاء
بطهر الدماء راح زارعها وراويها
خففى الاوجاع شوية
لملمى أيامنا اللى جاية
طبطبى ع اليتيم يلاقى حضن ينسيه الآسية
وافرشى طريقنا بودك
اعرفى مين اللى يودك
مين اللى اندبح بشوكك
ومين اللى بيسرق فى وردك
ياللى فى الكرم ماحد قدك
وزعى حبك علينا
وزعى حبك علينا