أنا المصري

اسمي مصري .. أهلي علموني إني مصري .. ربوني إني مصري.. وخلوني أعشق اسم مصر .. مكتوب في بطاقتي مصري .. وفي جواز سفري مصري.. لا أعرف يعني إيه إخوان .. ولا يعني إيه ليبراليين، لا أعرف يعني إيه ده ديني ولا يعني إيه ده علماني .. ولا صوفي ولا سلفي.. ولا يميني ولا يساري.. كل أملي في الحياة أشوف بلدي في المكانة اللي تستحقها - وهي تستحق الكثير - نفسي أشوفني ماسك علمها بارفعه في كل مكان براها وجواها وأزعق وأقول أنا المصري .. أنا اللي المغول وقفوا عندي .. وانا اللي جنود صلاح الدين كانوا من أرضي .. وأنا اللي أسرت لويس في المنصورة .. وأنا اللي في عهد محمد علي وصلت لحدود أوربا .. وأنا اللي هزمت إسرائيل ومرعوبة مني ... وأنا اللي من عندي مصطفى مشرفة وزويل ونجيب محفوظ ومجدي يعقوب ... وأنا اللي بنيت الأهرامات .. وأنا اللي الأزهر الشريف عندي ... وكنيسة الشرق برده عندي .. أنا قناة السويس .. أنا البحر الأحمر .. أنا البحر المتوسط .. أنا النيل .. وكل الخير في أرضي .

لكن اللي حكموني نسوني الحلم اللي عندي .. استحملت قلة سكن وقلة علاج وقلة مواصلات وقلة تعليم ... لكن لما وصلت لحدود كبريائي وكرامتي قمت ثورت وقدمت كل ماعندي.. وقف العالم في ذهول يصفق لثورتي و يكتب عن شهامتي وعن ثورتي وعن حضارتي ... 

شافوني وأنا باصلي العصر في الميدان وبيوضيني صاحبي اللي الصليب على إيده هو ظهري وأنا ظهره.. شافوا في يميني نوبي وفي شمالي جلابية معرفوش منها ده فلاح ولا صعيدي، وورايا غترة سيناوي من الشمس بتحميني.. فرحت فرحة واتنسمت من هوا أرضي.

قلت خلاص ارتحت.. أتاري الهم طالع من ابن بلدي.

أنا عايز بلدي عادية لا إخوان ولا سلفية.. لا ليبرالية ولا علمانية.. لا يمين ولا يسار 

أنا عايز حكومة مصرية مفيهاش تصنيف تحقق لي العدل في أرضي تعاملني بالحق وتحافظ على كبريائي وكرامتي وتوفر لي رغيف عيش أكل، وشقة أسكن، ومستشفى ودوا أتعالج، ومواصلات أتنقل بيها، ومدرسة اتعلم فيها.

أياً كانت الحكومة بس من ولاد بلدي

يا ريت نفهم يا عشاق السلطة والكرسي والحكم 

يا عشاق الفرقة والنزاع والخلاف 

يا من تضرمون النار في ربوع مصر باسم حب مصر.

مع تحياتي لمن يفهم

أنا المصري

هاني سيد أحمد

-->