خليك فاكر
اول مرة سمعت اسمهَا وابتسمت رغم انه كان قبلها اسم عآدى ،
كسوفها فـ اول يوم تتقابلوا وتسلم عليك
اول عيد ميلاد ليها وهى معاك لما جبت لها هدية مُصحف
يوم ما قعدت فـ الصالون وقرأت الفاتحة وسامعها برة بتقول " امين "
كلمة " مبروك " اللى قولتها وماسمعتش منها رَد عشآن كانت مكسوفة !
الدبلة اللى لبستهالك وهى ايدها " متلجة " من الفرحة
افتكر
اول خناقة حصلت بينكوا بسبب بت قريبتك مسهوكة ومفعوصة
وازاى صالحتها بـ شوكولاة من اللى بتحبها
بعدها بـ كام شهر لما خرجت معاها و " الكعب " اتكسر
فضلت تتريق عليها طول الطريق ماسكتش الا لما قالت لَك ,,
" بُكرة بنتك تطلع اوزعة زيى ولا هتقدر تتكلم ساعتها هِه بس "
وشها اللى " جاب الوآن " لما رديت عليها ..
" اسمها بنتنا حرف النون يدخُل فـ كلامك بدل ما اعورك "
لما كان عندها برد وفضلت تتصل بيها كل شوية عشآن تاخد الدوا ،
وخبطت على بيتهم فـ نص الليل عشان تطمن من عـ الباب وتمشى
افتكر
يوم فرحكوا دموعها وابتسامتها وقت ما قعدت جنبك فـ الكوشة ،
الشربات اللى كنت هـ توقعه والفستان يبوظ بس ربنا ستر :
اغنية " قلبك ماعدتشِ ملكك " وهى بتبص فـ عينك ،
ابتسامتك اللى فضلت مرسومة وانتوا بترقصوا عشان تزود فـ كسوفهآ
افتكر
اول صلاة فـ بيتكوا وانتَ امام وهى بتصلى وراك وسجادتها اتملت دموع ،
اول خروجة سوآ وانتوا متجوزين لما دخلتوا سينما ،
وصممت تتفرج على فيلم رُعب عشآن تتلكك وتعمل انها خايفة وتطمن بيك
الفشار وغزل البنات و " البطآطآ " اللى صممت تخليك تشتريهم ،
افتكر
لما اتأخرتوا برة اول مرة وقالت لك ..
" يالاّ بقى لحسن بابا يزعق احنا اتأخرنا يالهوى "
ضحكتك وردك عليها " بصى فـ ايدك الشمال هيه فيها دبلة انتى مراتى ياهبله "
افتكر
اول رمضان يعدى عليكوا والاكل اللى اتحرق
العيديّة اللى صممت تخليك تكتب عليها كلام ماحدش يشوفه غيرها وبس
وقفلت عليه فـ دُرج المكتب عشآن ولادكوا يتفرجوا عليها لما يشرفوا ،
مولد النبى والعروسة اللى دخلت بيها من الباب لاقيتها بتجرى عليك زى الطفلة
افتكر
لما رجعت لاقيت هدوم بيبى وفساتين لونها بمبى و " لكلوك " و كوتش بينور ،
وقولتلها " ده بجد ؟ " ماردتش عليك بس دموعها قالتلك اه بجد هتبقى بابا
مشاوير الدكتور كل شوية اللى عُمرك ما زهقت منها ،
الخناقة اللى عملتوها لـ مدة 5 شهور على اسامى البنات ،
المفاجأة اللى حصلت ليك وليها " اصلاً هى حامل فـ ولد "
افتكر ~
" واء واء " اللى سمعتها فـ المستشفى وخروج الممرضة عشآن تقولك ..
مبروك البيبى زى العسل ربنا يباركلكوا فيه
اول ما شوفته و هو قد كده خفت تيجى جنبه لحسن يتكسر !
صوت عياطه اللى ماكنش بيخليك تنام وكنت هتترفد من الشغل بسببه :
افـــتــكـر
كُل حاجة حصلت ليكوا سوآ من اول كلمة بحبك ،
لحد صوت طفل صغير اتكتب اسمك واسمها على شهادة ميلاده ،
مروراً بـ الغيرة و الخناق و النجاح والتعب و و و ...
ماتنساش
اصل الحُب ايه غير شويّة تفاصيل فوق بعض !؟
0 تعليقات:
إرسال تعليق