عُقدة حياته

دانا كل ما اجي أكتبِك
ألاقيكي أصعب م القصيدة
المعنى يفضل جوَّه مِنِّي كأنُه عُقده وإييييه..؟؟ شديدة
..
واتأكِّدِتْ....
صدَّقْــتَــها .. كَلِماتُــه دي صدَّقتَها
؛
واقعد لوحدي وافتكر
ــ قالتها مين؟؟؟
ــ الست أم المؤمنينْ....... ؟ آه ... عائشة ..
ــ قالت لمين ...؟
ـــ لحبيبنا سِيدنا المصطفى
ف ساعة صفا:
إزَّيِّ حُبي وشوقي يا سِيدنا النَّبي ..؟

قام قالْ لـَـها:
كالعقدة مش ممكن تفُــكْ

وكانِتْ تعدِّي عليه تملِّي ويحلا ليها تفكَّرُه :
إزَّيَّها ....؟؟
العُقدة يعني ازَّيَّها...؟؟

فيقول لها:
زَيِّ ما هيَّا ... وِفْ مَكانها
مين اللي بس يحلَّها...؟؟؟
...
وانا كل ما افتكر الحكاية ديّا ابُصّ للسما
وأصلي على سيدنا النبي

وادعي يا رب يحبني
زي النبي ما حبها
ويا رب انا
أفضل أنا
عقدة حياته اللي لا يمكن حلها
....
واسمعها مِنُه كل يوم :
دانا كل ما اجي أكتبِك
ألاقيكي أصعب م القصيدة
المعنى يفضل جوَّه مِنِّي كأنُه عُقده ... وإيه...؟؟ شديدة
..
شريفة السيد