نفسى أشوفك بقى يابلدى
لون غيطانك تانى أخضر
فى كل شارع فيكى فرحة
فى كل حتة زغروتة تكبر
نفسى اشوف وشوش بتضحك
مش دماء ودموع بتكتر
نفسى اشوف جموع بترقص
مش جماعة تحرق تدمر
نفسى أشوف ايدين ولادك
ايدين بتبنى وايدين تعمر
نفسى الاقى رجال بلادى
كلهم مافيهمش خاين
كلهم بينادوا جشنا
ويا شرطتنا مداين
هما الحمى هما الحماية
كل واحد لينا صاين
لما نتلم معاهم
يقوا بينا ونقوى بيهم
لو نفتتهم هانضعف
وهو ده حلم الصهاين
نفسى لو خرجت جموعنا
ليها حق عاوزة تشوفه
مايكونش فى ايديهم سلاح
يدبح الحق تضيع صفوفه
بصوا للعالم بص عليكم
والله هايموت من كسوفه
بصوا كده فى وشوش ولادكم
شوفوا الرعب ساكن وشوفوا
بكرة اللى راح من ايديهم
والنهار بيطَّلع فى روحه
نفسى نعبر بالسفينة
بايدين جامدة ايدين متينة
نعرف مين هو صاحبنا
ومين هو ابن اللذينة
مين اللى بيسرق فرحنا
امننا ولحظات السكينة
ومين هو اللى بأسم دينا
خلى دنيتنا حزينة
ومين اللى عملاء لبرة
جواسيس ومندسين فينا
نفسى تنشال دى الغشاوة
نعرف الوطنى م اللى خاين
نعرف طريقنا لفين يودى
نشوف الحق ظاهر وباين
ولما نغلط نقول غلطنا
نلقى العفو فدادين جناين
نفسى الكبر مايكنش فينا
نقبل الآخر دون ضغائن
نفسى لما تتفرق أراءنا
تجمعنا أصوات المآذن
0 تعليقات:
إرسال تعليق