ياست الكل

زين العابدين خضر 


فـ عيدك أبوس الكف في إيدك
مانا ابنك ودمي بيجري في وريدك
يا ست الكل يا أمي ....
يا شيلاني .... وحساني 
وشيفاني .... وسمعاني
وسقياني من حنان القلب
من قبل مابقي طفل وليد
دا كل يوم من ايامي
بيمر وانت فاكراني
وانا فاكرك ياست الكل
بيبقي نهاره زي الفل
واحس بطعم نفس العيد
يا ست الكل يا أمي....
يا سبقاني حدا همي
بدعواتك أنا عايش
تصبري فيا وتضمي
وتسقيني بكأس حنان
ولو غبت شهور وايام
حدا باب الدار بتستني
منين ألاقي زيك قلب
بحبك والله يا أمي
يا نور ف الضلمه نورلي
يا ايد ممدوده وقت العوز
برضاك الرب يرحمني
يا وخداني فـ حضنك دايما
وكأني لسه طفل وليد
دا كل يوم من ايامي
بيمر وانت فاكراني
وانا فاكرك ياست الكل
بيبقي نهاره زي الفل
واحس بطعم نفس العيد

-->