كل الموضوع بس ان انا فى بلد فيها حرب .. عادى يعنى
قاعده فى مكان فيه تفجيرات فى كل حته و عايشه مع ناس بيقتلوا بعض علشان حرب شمال و جنوب
و فى برضه حاجه حلوه , ان كل يومين كدا ييجى ناس مسلحين يهجموا على الاوتيل .. ف الناس اللى قاعدين هنا اللى برضه مسلحين يشتبكوا معاهم
بس متخافوش عليا .. انا صغيره و بستخبى عادى
و كمان بما ان هنا كل الناس معاها سلاح ألى و ار بى جى .. ف هما الحمد لله بيعلمونى اشيل سلاح برضه زى مانتوا شايفين
و الجديد بقى .. ان محطه الكهربا اتقصفت و جزء من المدينه بقى مفيش فيه كهربا .. ف احنا هنا فى الاوتيل مشغلين الجنيراتور اللى لما الديزيل هيخلص منه هنبقى هنا من غير كهربا .. يعنى من غير انترنت .. من غير تليفونات .. من غير نور .. من غير داعى
ف ياريت محدش يقلق لما يلاقى ان التليفونات مقفوله و انا مش موجوده ..
انا عارفه طبعا ان فى سؤال حضرتك بتسأله بقالك كتير .. أنا ماتنيلتش رجعت ليه ؟
أرد عليك و اقولك المطار أتقفل من 9 أيام و كل الرحلات أتلغت و المطار أصلا اتدمر
هتقولى امال المفروض تمشى ازاى ؟
أقولك الوزاره بتقول ان احنا نروح عمان أو السعوديه ( أيوه نروح لوحدنا )
يعنى نمشى طريق 700 كيلو على الأقل جوا اليمن .. اللى هو تقابل و انت ماشى عصابات مسلحه على شويه حوثيين و ايرانيين على تنظيم قاعده و داعش ( و طبعا ماقولش ان انا مصريه علشان هتقتل ) .. دا غير بقى قوات التحالف اللى بتضرب من فوق .. بس انا عارفه ان هما هيحسوا ان فى مصريه معديه تحت و مش هيضربوا فى الوقت اللى بعدى فيه .. و انشاء الله نوصل
بس الصراحه بتبسط و انا شايفه كل يوم كدا دوله تبعت البحريه بتاعتها تاخد الناس بتوعها زى السعوديه و باكستان و الهند و تركيا و الصين ..
أه و الله الصين .. شوف الصين فين و اليمن فين ؟؟ بس بعتوا برضه
احنا بقى كمصر اللى هو الناحيه التانيه من بلكونه البحر الاحمر لسه مبعتناش
و أصلا اساسا احنا البحريه بتاعتنا كدا كدا موجوده هنا فى البحر قدامنا ..
بس مش علشان ترجعنا مصر حضرتك .. دى علشان تأمن مضيق باب المندب علشان باب المندب مهم .. ايوه باب المندب مهم ..
المهم ان طالما مضيق باب المندب كويس و بخير
يبقى انا عايشه .. أنا كويسه .. انا تمام