فوق الحروف

 ‏الشاعرة اكرام عيد‏.

حطيت نقط
فوق الحروف
بعد انفجار ليل الكسوف
قررت
انك تنسحب
من بين ايدين الذكريات
و تنسى أجمل أمنيات
عشناها فى زمن السكوت
ليه البرود
وليه بتحرق
كل حرف فى سكتى
ليه خطوتى
مبقتش بتنادى الطريق
وانت الصديق
اللى ما كان أبدا برئ
كل اللى تتمناه أخدته
وانتهيت
و ابتديت
تنسج خيوط الشر
فى كل اتجاه
ورغم معرفتى الأكيدة
بالحياه
مشيت معاك
مبقتش شايفة
أى حاجة
غير هواك
وانت
هناك 
واقف كما تمثال جليد
رافض
تدوب بين السنين
نيران حنين بتشدنى
من تانى ليك