هو:
ما بين عينيها وخط الحاجب
آخذلي يوم أمشي وصابر
نظرة حبيبتي طريق طويلة
خذني التعب وانا باكابر
هي:
ما الحرف فيهم يقول بحور
وشوقي باين ع السطور
دي النقطة عاوزالها سنين
عشان تفسر لحظة شعور
هو:
ما بين شطين احتار دليلي
أعوم ازاي غلبان يا ويلي
موج شفايف وبحر نظرة
دي النطة فيهم تهد حيلي
هي:
خليك هنا في حضن رمشي
اوعى تقول انك ح تمشي
كل الدنيا في اللمة ديه
تبقى البدر ليا وشمسي
هو:
ع الخد وردة تقولي هات
كفك ونسيني الآهات
اسقيني بوسة من هواك
منها نلحق اللي فات
هي :
صب كاسك وأنا أشربه
واللون ع خدي إسأله
طعم الهوى وساكت ليه
خليه في جنة ما تكلمه
هو :
خطوة خطوة أتوه وياك
أبيع حياتي عشان لقاك
وإن ضعت يعني ح اروح لفين
ما انت المنى فرحي معاك
هي:
حط نورك ع الجبين
وطابع يحلف اليمين
نفضل سوى العمر كله
وروحنا وحدة ميش اثنين
0 تعليقات:
إرسال تعليق