مشهد أوّل
............
الشمس مكسوفة
تدفّي الشارع الغرقان
بدم المحرومين م العيش
فقالت ......
تسلِّم ضيّها لليل
تتغطّي بالقمرة
والقمرة ممنوعة
بِفعل الحظر للتجوال
وحتى ف أحسن الأحوال
لو الليل بَص م الشبّاك
بحور الدم بتسقّط
ورق توُته
برغم كسوفه وسكوتُه
بتظهر عورته للناس
مشهد تاني
............
تتر مسلسل
" أكتر حاجة تخلّي ف ثانية جبل يِدّك
لمّا تلاقي العيلة اللي تلمنا تتفك"
وخناقة مابين الولد الطيب
ومراته الغرقانة.....
ف مضيق البسفور
وبتحلم......
إنه برغم همومه يبقي مهنّد
وإن عيونه لمّا تشوفها
تبقي النور!!!
والولد الطيّب أحلامه
محصورة......
ف إنّه يفك حصارها
ويغيّر قنوات أفكارها
ويجيب أخبار!!!!!
مشهد ثالث
.............
الثورة بتسقّط ورود
والورد بيسقّط نظام
والبلد تغرق تولّع
عاشوا تُجّار الكلام
مشهد رابع
............
بنات الليل ....
نجوم سهرانة
تحت كباري أحلامهم
بجتّة تلمْ
كام حفنة من الأجاع
قُصادها....
كام جنيه ورغيف
بنات الليل....
اختاروا بيع النهار
للّي دَفَع أكتر
والحلم يتمختر
فوق كتفهم نِفسه
ف عيشة نضيفة
فوق الكوبري
مش تحتُه !!!!
مشهد خامس
.............
رعشة ميدان.....
يسقط يسقط حسني مبارك
يسقط يسقط حكم العسكر
يسقط يسقط حكم المرشد
تسقط كل الروس الجاية
راس الأفعى وراس الحيّة
واللي رئيسه ماجاش على كيفه
يستنهض روحه الثوريّة
مشهد سادس
...............
رجع الغريب
لبلاده بالفرحة
مادد دراعاته
وفارد الأحضان
وبلاده مش عارفاه
قَدَر الولد غُربته
عاش فيها متغرّب
وسابها مستغرّب
إنّها سايباه
لَفْ ورِجع تاني
فاكر هيوحشها
زى امّا كات وحشاه
راجع ولسّه غريب
وبلاده مش فاكراه
آخر مشهد
..........
لو جالك الطوفان
خَطّي على عيالك
واحرق كنايسهم
ودنِّس الجامع
متسيبش فيها ولد
غير لمّا يبقي شهيد
اِشعِل ف نار الفِتن
ونادي بالتجديد
لف العيال ف الكفن
وإلبس هدوم العيد
::
منى حواس
0 تعليقات:
إرسال تعليق