محمد الساعي
يمر العيد وراه العيد
وإنتي يا امي وياَّيا
برغم انك رحلتي بعيد
باحسِّك عايشه جوايا
بحضن كبير ولمسة ايد
وحدوته .. وضحكايه
وكل مُناكي ابقى سعيد
وكونك جنبي دا منايا
****
وحشتيني يابحر حنان
وحشتيني يا اعظم أم
في حضنك ياما عشت امان
وبيدك ياما زلتي الهم
ياريت ترجع ليالي زمان
يا ساكنه في الوريد والدم
وتحكيلنا وكان ياما كان
ومن حواليكي نيجي نتلم
****
باقولك يامَّه يوم عيدك
مانيش حاسس بفرحة عيد
كبرت وبرضه محتاجك
عشان اشعر بإني سعيد
ولسه الغربه وخداني
ووحداني .. وقلبي وحيد
وجودك كان مالي الدنيا
بحنِّيه .. وحب شديد
عزايا ان انتي ويايا
في كل قديم وكل جديد
0 تعليقات:
إرسال تعليق