اكتب وقول ياقلم

للشاعر سمير القط

اكتب وقول ياقلم

اكتب وقول ع اللى راح

وامحى كمان الجراح

وانده وقول ياصباح ...

انت لزمانى هدية..

اكتب وقول ع الشهيد

واكسر جدار الحديد

وارسم نهار للوليد

وانت شموسه الهنية

اكتب وقول ع الخسيس

اللى فى سجنه جليس

واللى فى روحة حبيس

راجل واصله وليه

اكتب وقول ع الشباب

واللى بعلمه ماغاب

واللى اتعمله حساب

ولسه بايده العطية

اكتب وقول ع الولاد

اللى صاحوا بعناد

بين الحدود والبلاد

وضحوا وزادوا شوية

اكتب وقول ع الكفاح

واكشف ذئاب بالنباح

نابهم سهم ورماح

هموا بقتل الضحية

اكتب وقول ع الصديق

واللى فى اصله رفيق

تخلى وضاع فى الطريق

يفتن لانه رمية

اكتب وقول ع الامال

والعزم ويا المحال

لما يفوق الجبال

لو كان بالمسئوليه

-->