بقلم/ يوسف جاد
بصرُخ .. وأقول ...
يا وطنْ ..!!
ياللي عليك خايفْ
عصبُوا العيون
يا وطنْ ..،
خلُوني مش شايفْ
نهشُوا في لحمي
الدّيابة ..،
والكدب .. بالقوانينْ
باعُوا الميزان
يا وطنْ ..!!
والعدل ف الزنازينْ
زهرة شَبابك
شابتْ ..!!
من كتر ما شافتْ
والباقي وهبُوا
الرّوحْ ...
راحُوا ف سبيلك
جُثثْ ..،
م المُوت .. ما خافتْ
ويوم ما شلتْ
العُصابة ..،
والغُمة أهي زاحتْ
ضربُوا ف عيُوني
الرُصاص
عشان ما شوفش
الضيّ
ده أنا حتي لو أعمي
حصرُخ .. وأقُول
أنا .. حيّ
ده إنت الفُؤاد
يا وطنْ ..!!
ياللي ما زيّك .. زيّ
ما يعرفُوش .. يا وطنْ
إنّي وهبتك .. رُوحْ
حسْتكتر عليك العُيون ..!!
لو كانت فداك ...
ما ترُوحْ
ملعُون أبُوك .. يا سكُوتْ
لازم أعلّي .. الصّوتْ
وأصرُخ .. بكلّ ميدانْ
أصرُخ عليك
يا وطنْ ..!!
شلتْ العُصابة خلاصْ
أخدُوا عينيا .. فداك
لكن ده صُوتي
رُصاصْ
بصرُخ عليك ...
يا وطنْ ..!!
ياللي عليك خايفْ
0 تعليقات:
إرسال تعليق