بحلم

عبد الستار زيدان‏
***
أنا زي ناس ..
كتير
على الهامش ..
في التسطير !!
بس نحب الكلام ..
دوغري 
من غير لفّ ،
و لا تشفير !!
بنحب القاعدة ..
ع الرصيف 
نغمّس بالعرق ،
الرغيف 
و بالحلال عايش ..
سفير 
و في العصاري ..
قدّام داري ..
أنا وجاري 
فرشّنا للحبايب ....
حصير !!!
أنا بين الكبار ..
هلفوت ...
زغنطوت ..
مجرد صوت ..
ف انتخابات..
التزوير !!!

عمري ما حلمت ..
أكون ملك أو ..
وزير
في بلادنا المعمورة
الحلم و الوكل ... 
بالمقادير !!
أو أكون حتي ..
نائب ..
و أسير .
و الشعب من ..
غير نايب ..
في التغيير !
مات الملك ...
عاش الملك ،
و المدير نفس ..
المدير !!!
و في العزبة ...
نفس الغفير !!
و على ثورتنا ....
اللوم ، و التقصير ..
بحلّم و الحلم ..
مش كبير ..
بحلم ما أخاف 
من كلمة حقّ 
ربك و الحّق ..
من غير تفسير!!!
بحلم إني ما أخاف
من بكره ال حاف
و الغموس ف الجنة
من غير تقطير ،
أو تقصير !!!
بحلم يا مصر 
أرجع تاني ...
راجل أمير !!!!