يانن الننى
وجوا العين والقلب
ياعمرى وسنى
وكل مافيكى يتحب
تمر شهور ورا أيام
وصورتك ساكنه جوايا
مايكفيكى حروف وكلام
ولا أوفيكى فى عطايا
على ايدك روانى الحب
وكنتى للحنان آيه
وطول عمرى بادعى يارب
تكونى دايمه ويايا
وابوس ايدك وانول الحب
من الرحمن يامايا
يانن الننى وجوا
العين والقلب
ياعمرى وسنى
وكل مافيكى يتحب
يااجمل كلمة بنْطَقها
وعلى ايدك وَعِيت روحى
يااطيب كلمة بعشقها
بتشفينى مع جروحى
ينام الكون بكل عيون
وعينك م التعب ماتنام
تضمينى منين ماأكون
وتخدينى على الاحلام
عانيتى م السنين الوان
مابين فرحة وبين حرمان
وضحيتى بكل حنان
على دربك باعيش فى امان
يانن الننى وجوا
العين والقلب
ياعمرى وسنى
وكل مافيكى يتحب
ياشمس حنان تدفينى
على هَديك انا ساير
انول حبك يكفينى
دليل يهدينى وانا حاير
كل شئ ممكن يهون
الا بُعدى عن حنانك
لولا فضلك ماكنت اكون
او يكون للكون جمالك
دانتى اللى شقيتى نهرك
وانت اللى ربيتى مُهرك
وانت اللى زينتى زهرك
ولو اطول لاموت عشانك
يا كل كُلى وبَعدك انتِ
ماليش قلوب
لو تغيبى ساعة عنى
راح تغيب كل الدروب
والقى نفسى فقدت سنى
وغاب شبابى فى الكروب
ومهما ابكى احس انى
وحيد شريد زايد خطوب
خاطفة قلبى وروحى منى
ماانت روحى وازاى اتوب
الف رحمة ماتكفى منى
من حنانك او تنوب
يانن الننى
وجوا العين والقلب
ياعمرى وسنى
وكل مافيكى يتحب
كل سنة وكل أم طيبة
وبخير وصحة وسلام كل سنة وكل ام تغمرنا بحنانها على مر الايام كل سنة وانت
روح الروح بمحبه وشوق ووئام …سمير احمد القط
0 تعليقات:
إرسال تعليق