زى امبارح

الشاعر صابر العربى
زى امبارح 
ايوا انا فاكر كل خيوط الشمس
فى قلب الليل 
ونجم الغيط السارح
لما يِعدْ بهمس رموش الخيل
........ كانت كل الدنيا براح
وقلب البت الصافية سماح
لما تقول بالكلمة الصادقة صحيح أستاذ
وان الشعر 
جوا عيناك اعجاز
كانت تضحك لما باقول
فاكر لسه
نور الجاز 
والطبلية ونظرة جدو مع العكاز
كانت كل الدنيا براح
وادينى كبرت وكلى جراح 
شايف حلم الغيط الأخضر
غول فى قلبه بلون تفاح
وهم فى قلبى بوطنى بيكبر
خايف قلبى يكون سفاح 
واقتل جوا عينيك الحلم
بكل غباءى ادوس ع العلم
وانسى امبارح
وانسى الليل

بالتبرير
نفسى اعيش جوا عينيك ِ فى يوم مرتاح

وانسى البيت
ولون الطين
وانسى تاريخى
وانسى كمان حرب السبعين
وارسم ليك ِ الدنيا
قصر ازاز

اوعى تقولى أنى اتغيرت
ماهى كل قلوب الناس 
بتتغير
وكاره انى بجد كبرت
يارتنى فضلت بقلب الماس
لسه صغير
زى امبارح 
ايوا فاكر كل خيوط الشمس
فى قلب الليل 
ونجم الغيط السارح
لما يِعدْ بهمس رموش الخيل
........ كانت كل الدنيا براح
وقلب البت الصافية سماح
لما تقل بالكلمة الصادقة صحيح أستاذ
وان الشعر 
جوا عيناك اعجاز
كانت تضحك لما باقول
فاكر لسه
نور الجاز