عتاب

شعر/ د. جيهان نجم

أيوه من حُبِّي أعاتبك
لما يتواري الحنين
لما تنسانا السنين
و يختفي صوت اشتياقك

لما يصرخ احتياجي
و انت مش داري بأنيني
و اللهف يبقي جريمه..
يبقي من حبي أعاتبك

أيوه من حبي باعاتبك
لما تتخنق الآهات
و الحنين يتوه في صمتك
و الكلام يصبح سكات

لما يبقي البعد عادتك
و اللقا خارج اهتمامك
لما تغرق جوه صمتك
يبقي من حبي اعاتبك

لسه من حبي هاعاتبك
لما هتطول الليالي
و السؤال يبقي عزيز
يبقي من حبي هاعاتبك