النهارده لسه عارف
معنى كلمة يُتـّم إيه
يوم ما ماتت دعوة امي
بحر حزن غرقت فيه
تاهت الالوان ف عيني
سمعت الصرخه أنيني
فاضل ايه ف الدنيا قولوا
بعدها أبكي عليه
كانت الضَهّر اللي ساند
فيها ضَهري لما اتعب
كانت الفرحه اللي تضوي
بين ضلوعي لما ألعب
مين هيستوعب مشاكلي
غيرها مين هيحب شكلي
مين يخاف لو يوم عليا
ف دنيا فيها الخلق ترعب
كنت اشم الجنه فيها
كنت ابوس رجليها وابكي
كنت اداري كتير عليها
لما تغرق يوم مراكبي
لجل ما يخف العتاب
لجل ما يزيدشي العذاب
كانت الثلج اللي دافي
لما تاهت يوم كواكبي
اقرب الناس جُم سابوني
يومها جاتني وقربتني
واما شافت نار ظنوني
جاتني يومها واحتويتي
كانت النور والاماكن
كانت الشمعة ولكن
نورها ولىَ عن حياتي
حتى من نفسي خدتني
لو مطر م الدمع ينزل
يوم عليها ما يساويش
لحظة من خوفها عليا
أو أموت أو حتى اعيش
حضنها والله واحشني
عمر شئ عنها ما حاشني
هي كانت كل عمري
بعدها الكون صار مفيش
0 تعليقات:
إرسال تعليق