عشان قلبي طيب

سيد حربى


عشان قلبي طيب هجرت الميدان..
و نمت في بيتنا و سيبت اللجان..
عشان قلبي طيب عارضت الشباب..
و صدقت حسني و فتحي و شهاب..
.
.
عشان قلبي طيب ووطني و غيور..
قفلت الجزيرة و قاطعت الدستور.. 
عشان قلبي طيب فرحت بشفيق..
و صدقت كل اللي قاله الفريق..
.
.
عشان قلبي طيب بكيت لما فارق..
و قلت ده عمره ماكان وغد سارق..
عشان قلبي طيب دعيت له بشفاء..
و يحفظ له سوزي و جمال و علاء..
.
.
عشان قلبي طيب بقيت م الفلول..
و قالوا عشقت اني اعيش مذلول..
عشان قلبي طيب كرهت السلف..
وكل اللي عن فكري يوم اختلف..
.
.
عشان قلبي طيب نسيت المظالم..
و كدبت أهل الشهيد المسالم..
عشان قلبي طيب شتمت العسس..
و خليتها ضلمة و قاطعة النفس..
.
.
عشان قلبي طيب عزلت الوزارة..
و قلت يغوروا في ميت خرارة..
عشان قلبي طيب لغيت الانتخاب..
و سبت مصيري في ايد الشباب.. 
.
.
عشان قلبي طيب مافيش برلمان..
و بكرة هايجي رئيس بهلوان..
عشان قلبي طيب مشيت ع البلان..
و ضيعت ثورة شهيد الميدان.

-->