ياريتك تهدّي الحكايه وتهدى
فقيرنا بياكل بملح الرغيف
ورابط حزامه بميت الف شدّه
***
مش احنا اللي نورنا ينوّر عينيك
وياما بروحنا وقفنا نناديك
ف ليه فجأه نورنا ما جابش البصيص
وليه جي تدوسنا بقسوه النهارده؟
****
جناب المعالي بكل احترام
عليك المحبه وعلينا السلام
بنينا ف روحنا بناني الحمام
وجينا نقدّم فروض الموده
***
ف طبطب علينا وحاجي ودادي
ودوّر ف عش النسور والحدادي
هتلقى اللي يرصف شوارع بلادي
بحجره زمرّد وحجرايه فضه
***
رئيسنا المبجل لالالي أمان
غلابه الأرانب ف سيبها ف أمان
وقصقص مخالب قططنا السمان
ورُد المظالم ولو مرّه واحده
***
كفايه علينا سنين ف المهانه
وكله علينا ما حدش معانا
دا ربّك وضعنا ف رقبتك أمانه
أمانه تصونّا كفايه اللي عدّى
...................
هناء جــودة - المحلة الكبرى