............................
هقولك كلمة يا بلادى
منيش عارفه أكون بيكى ولَا بيا
وخايفة ع الوطن جايز
يكون الجرح فيه غيّّة
مهوش عادى .
أشوف الدم ف عيونك
و انام واصحا على بكره
تكونى م الأمل فـــكره
ولا ناسية ولا فاكرة
ما بين الظن و الطيبة
واعيش جوايا أحلامى
على خيـــبة
مهوش عادى
أكون الأم والكلمة اللى بتحنن
وتحرقنى سموم الغدر ...فاتألم ....أو اتجنن
يجينى الوِلْد جوّه القلب... متــكفن !!
ودمعة روحى بتعانى
واقول تانى
بحبك رغم أوجاعى وأوجاعك
و هكره ابنى لو يتغابَىَ ...أو باعِك
واشد سماكى فوق الأرض تتحنى
وأمد الكف بين أحمد..... وبين.... حَنَّا
ودا دورى
ودورك لو تَغَلَّى الملح فى زادى
يغور الملح لو بالسحت يا بلادى