رسالة

‏علاء الدين هدهدمعلهشى
سامحنى.... وحياة عينيك
أنا مش هاطول عليك
أنا بس حابلغك رسالة والسلام
القلم بين ايديا مش عارف ينام
مخاصمنى
مفارقنى
مضرب عن الكتابة والكلام
كل الحروف اتفرقت
اتبعترت
اتغيرت فى تشكيلها من بعد البعاد
واللى جد وزاد
انى مش لاقى منها غير العناد
اى كلام بجمعه
اجى انطقه
اطلعه
ألقاه يكون كلمة واحدة 
كل الحروف ليها متحدة
تنطق وحدها من غير مداد
تكتب وداد
ترسم بلاد
تنحت من مشاعرى احلى كيان
جَنْـنْـتَـنى
وألقاها تقول 
وحشتنى
ياللى اخدت معاك السعادة
مافيش زيادة 
اقولهالك بعد اللى فات
لو انت قادر ع البعاد
وع السكات
وعلى كتمان المشاعر والآهات 
قلبى محملنى ليك السلام
وحشتنى
بيقولهالك من غير عتاب ولا ملام
ولا سؤال مين اللى كان
هو السبب فى الغياب
وفى الخصام
اعرف وشوف 
قد ايه بينا الفراق
زاد وفاق
كل المسافات فى الهوى
وقد ايه بتختلف مابنا الفروق
وتتشعب كمان الطرق
اسمك وبس اللى بيترسم على الورق
أجى اغيره
او اعدله
او اكتب شخبطة من غير نظام
ألقاه اتمحى منى الكلام
ألقى كل الورق فجأة اتحرق
ألقى الوحى منى اتسرق
ألقى نفسى بروح فى السكات زى الممات
زى المركب لما سقط منه الشراع
وضاع
واتكسر المجداف وانفلق 
واتاكد المراكبى انه خلاص
تاه ولاص
وغرق
غرق
غرق