عَسَــل

محمد شحاته العمدة

اِخـْص عليكى !!
تِنسى أبوكى
اللى مرَبِّـيكى
اللى معَــلِّيكى
اللى مخَــلِّيكى فوق الراس
حتى كتاب الله حَـفَّــظــتِـك
ســورة "الفاتحة ، والإخــلاص"
ولاَّ خــلاص
قلبِك ما بقاش هوَّ القلب
قلبِك صَلب
قلب ما فوش أبداً احساس
بس حا يالله ... يعَبِّى ف دم
يفَضِّى ف دم
وحتى الدم
ما بقاش حامى زى زمان
ما بقاش غالى زى زمان
بقى ينداس
للدرجة آدى أنا كنت مضايقِك
قال وأنا فاكر
إن أنا حافظِك
فاهمِك
ضايــــقِك
إنى خفيف ... على قلبِك خالص
إنى لـذيذ ... كالعَـسَل الخالص
كِيف أصبحْت ؟
عُدْت ما خالِص ... من تَجريحِك
يا أم جناين خَضرَة ولكن ...
طَرَحَت سِم
مش هتلاقى حد يدوقِــك
مُش هتلاقى حد يطــيقـِك
ويـصَـفِّى تعــكير الــدم