أنا على الجرح متعود
ولا هشكى ولا هبكى
قوليها وأنا راضى
حاسيتك قبل ما تحكى
أنا معاهدك امام الله
أكون منك
أكون ليكِ
أكون شمسك
أكون ضلك
أكون دمك فى شرايينك
أكون صوتك
أكون همسك
وأكون عاشق لاحلامك
اكون البسمه ف خدودك
فى ليل الوحده بناديكى
تجينى تسعدى حالى
أنا صوتك
أنا دمعه فى عيونك
أنا الوحده اللى قتلاكى
أنا الليل لما يسكن حضنك
تحسى بشوك جواكى
يتوه دمعك
تغيب روحك
أنا المدبوح بسكنتك
ولا عمرى فى يوم خنتك
ومهما تعاندى وتقاسى
ألاقى قلبى بيحبك
أنا صابر على فراقك
أنا اللى خانتنى أحلامى
لما أخلصت فى حبك
أنا حب مخلوق جواكى
مهما تبعدنى أيامك
يشهد ربى على حبك
تشهد روحك إنك ظلمانى
قوليها وإجرحى قلبى
أنا على الجرح متعود
قوليها وأنا راضى
قلبى مش لعبه بإديكِ
تتسلى وقت ما تحب
شفتى الدمع فى عيونى
ساكن كل وديانى
بكيت وأنا عاشق
فراق حلم ينسانى
لاقيتك بتجرحى حضنى
تهت وكأنى طفل و بيبكى
حسيت بضعف ف قلبى
خيال الوهم مالكنى
مش بندم على حبك
ولا لحظه حب عشناها
بندم على سنين عمرى
ماتت وقت ولادتها
يا ترى جرحى بيكفيكى
وحلم العمر ضاع منى
هنت عليكِ
زى ما هان عهد الله
ووعد كتبتيه بأديكِ
أكون ليكِ
نسمه طايره حواليكِ
يا ترى جرحى بيكفيكى
قوليها واجرحى قلبى
أنا على الجرح متعود
قوليها وأنا راضى
حاسيتك قبل ما تحكى
بقلم / سيد منيرعطيه
0 تعليقات:
إرسال تعليق