===============
كان هنا فى نفس المكان
كان هنا بيتنا هنا العنوان
كل شىء بيدور علينا
كل شىء بينادى علينا
روحنا فين؟؟ أحنا فين
احنا هو أحنا ولابقينا مين
لا ياصحبى الدنيا هيه هيه
لكن مش شايف بشر مش شايف
انا اتعميت ولا نظرى ضعيف؟
قولى ياصحبى راح فين العنوان
فين بيتنا الكبير ؟ فين اللعب والضحك
فين الأنس ولمة الحبايب والجيران
طيب فين ضحكتنا ؟ وقعت مننا وضاعت
ولااحنا اللى مش عارفين نضحك؟
قولى وحياتك احنا ليه أتبدلنا كده؟
والله انا مش شايفنى ولاشايفك
هى زحمة بشر على أراضينا
فاكر زمان ياصحبى وايدك بأيدى
نسافر الدنيا ونرجع نلاقى وحشنا المكان
نقول يااااه ده الشارع أترصف وشكله حلو
وكمان الرصيف دهنوه بالألوان وشكه جميل
حتى الشجر مات والحجر الاصم بكى علينا
يااااااه ياصحبى حتى الورد لونه مبقاش طبيعى
راحت ذهوته وراح عطره بقى مسخ وكذب
فينك تقولى ايه اللى جرلنا وايه اللى كان
كنا بنقرأ بعض من نظرة من همسة من حركة
هو عقلنا ليه بقى شارد وكل واحد مش مصدقنا
الناس راحت فين ياصحبي؟ وفين الحب والحنان
سنين بدور عليك ومش لاقيك وان لاقيتك ألاقيك حزنان
حد يفتح لنا النور ولا السما صبحت غيام ونهارها ظلام
فينك ياصحبى ؟ فينك يااخويا ؟ فينك ياجارى فينكم يابشر
رجعنا لأول العصور واول عهد للإنسان على الأرض
رجعنا كما غابة يسكنها الوحوش والافاعي ؟؟؟
انا لومشيت من الدنيا هكون حزين على شىء لم افعله
هو انى يمكن لم ابحث جيداً عن أصل الإنسان
فالدنيا هى الارض والشجرة فيها هى الإنسان
ياريت ترجع الناس بقلب جميل كما اول ماكان
ويرجع الحب والاخلاص والوفاء سعتها بس
الدنيا هتبقى حلوة وسعتها هيكون الإنسان ... إنسان
ليست هناك تعليقات:
إرسال تعليق