حادى بادى

الشاعرة زيزى صفوان

أمريكا بتقول حادى بادى
و غرابها الإسود بينادى
الدور على مصر المرة دى
علشان يرعب كل الوادى
إصحوا وفوقوا يا كل ولادى

دول عاوزينها حرب شوارع
و كنايس تولع وجوامع
أحزاب و طوايف تتصارع
عاوزة تمسحنا بأستيكا
علشان دلوعة أمريكا
قولوا لجون ولا اوباما
بكره هانوصل بر سلامة
و تغور أمريكا بفلوسها
و لايكتم على نفسى كابوسها

إحنا مش هنود و لا حمر
و لا فى قلوبنا خوف ع العمر
إحنا ولاد النيل السمر

و افتكروا العراق و إيران
و مجازر بلاد الأفغان
و مهازل سوريا ولبنان

اوباما
شوفلك ملعب فيه تتنطط
غير مصر و الشرق الأوسط
مش راح تنجح مهما تخطط

و ياريت تسأل بوش الأخير
عندنا الجزم كتيير