ميرال المصرى
هو انتي ليه محجبة؟
موضة؟
قرار غلط خايفة ترجعي فيه فالناس تقول عليكي أخلاقك وحشة؟
شكلك أحلى بيه عشان شعرك وحش؟
غصب عنك؟
تقليد؟
ولا إقتناع؟
طيب هو إنتي أصلاً محجبة؟ ولا شبه المحجبات؟ ولا بس لابسة طرحة؟ أو طرحة بتستهبل باين منها نص شعرك؟
طيب هو يعني ايه أصلاً حجاب.. حجاب يعني "ساتر".. ولمعلوماتكم لا يوجد لفظ حجاب في القرآن أو الأحاديث.. لا أعرف أصل الكلمة ولست مهتمة .. المهم المضمون.. أنه الدين بينادي بالستر والحشمة وعدم الإثارة.. وفي الاسلام شكل الستر ده سموه على أيمانا "الحجاب".. أنا لا بدافع عن الحجاب ولا أنا ضده.. ده مش هدفي أصلاً من الكلام ده.. كل واحدة حرة.. أنا نقطتي بسيطة.. خو إحنا ليه شكلنا كده؟
تعالوا نقارن بين المشاهد دي:
1- شابة ترتدي فستان طويل فضفاض نص كم.. شعرها مرفوع لأعلى.. لابسة حذاء دون كعب.. وساعة! آه ساعة لازم أكون دقيقة :)
2- شابة ترتدي بنطال جينز ضيق من فوق حتى "عصعوص" ساقها.. وكارينا.. وبلوزة حمراء كتف وكتف ضيقة ايضاً تنتهي عند حد البنطلون.. حذاء عظيم بكعب بيرن في الشارع والشغل والمطعم.. "أكسيسوريز" بتشخلخل في ايديها.. ومن فوق لابسة طرحة وباندانا تحتها ومافيش ولا شعراية باينة؟ حجاب ده صح؟
3- شابة ترتدي بنطلون رياضة واسع.. وجاكيت البنطلون واسع أيضاً.. شعرها ضفيرة ولابسة حذاء رياضي..
4- شابة ترتدي legging الكارينا أسود.. ولابسة فوقه فستان قصير ضيق من عند الوسط.. وعاملة الطرحة "spanish".. حجاب بردو صح؟
5- شابة ترتدي تنورة قماش واسعة وقميص أبيض وجاكيت قماش فضفاض.. ولابسة طرحة تغطي منطقة الصدر على الأقل.. حذاءها لا يصدر صوت..
الأمثلة لن تنتهي.. بس أعتقد عرفتوا مين في الأمثلة دي "مثير" ومين "عادي أو نص محجبة" و من "حجبت" جسدها تماماً..
عندما كنت في اسطنبول لاحظت أن النساء هناك نوعين.. الأول مش محجبة وترتدي شورت أو جينز ولبس عادي شبهنا.. إلخ والثاني محجبة وترتدي الزي التركي المشهور.. جاكيت فضفاض يغلق بزراير من الأمام وطرحة مثلثة من الأمام والخلف تغطي منطقة الصدر.. وتحت الجاكيت لو مش طويل تنورة قماش بردو..
عادي هناك يا محجبة يا مش محجبة!
إلا في مصر..
صديقي الدنماركي سألني مرة في آخر زيارة له في القاهرة: لماذا ترتدي النساء غطاء الرأس وملابسهم مثيرة جداً ربما أكثر ممن لا تغطي شعرها؟
وفكرت كيف ارد.. قلت له ثقافة؟ وبعد ذلك فكرت.. هو ليه كده فعلاً!؟ ما أنا ساعات باعمل كده أصلاً! ولما تأملت أكثر وافتكرت صورة الطرحة الجديدة اللي على شكل تسريحة الشعر اللي عاجبة المحجبات.. وافتكرت فتوى أحد الشيوخ بجواز إرتداء ممثلة لباروكة شعر بدلاً من شعرها وبهذا تظل محجبة.. عرفت أصل المشكلة إللي عندنا! أيه هو؟ أننا عمرنا ما بنفكر إحنا بنعمل إيه ليه! إحنا بنكرر الكلام وخلاص.. والنتيجة أننا بنعك!
قعدت افكر طيب هو ليه الحجاب مبقاش حجاب؟
وجدت الأسباب الآتية وهذه ليست على سبيل الحصر:
1- الصراع الأبدي: أأكون متدينة أم جميلة؟ المجتمع يريد الاثنين وبيطلب الاثنين..الله يريد الحجاب.. وأنا أريد الجمال؟ كيف أوازن بين هذا وذاك
أنا لا أود أن أتخلى عن شكلي الجميل؟ خلاص هبقى بجسم متلون.. وعليه طرحة! ومسكنا العصاية من النص! بس أريد أن أضيف أن اهتمامك بأن يراك الاخرون جميلة هو جزء متأصل في طبيعتك.. وقرار الحجاب هو قرار بجهاد نفسك عن ألا يراك الاخرون بكامل جمالك.. مما يعني أنك واثقة أن لديك جوانب أخرى أرقى وأهم من الجمال الجسدي ستستدعي الاطراء والمجاملة! مش قادرة خلاص.. شيلي الطرحة حتى تقرري ذلك!
2- إرتباط الحجاب في أذهاننا بالفلاحين والقبح.. فعملنا نوع جديد من الحجاب.. "الحجاب المودرن" العصري.. الراقي.. إللى هو أخبي شوية وأبين شوية.. بس خلاص كده مبقاش حجاب.. طيب ما طبيعي يكون شكلك بالحجاب أقل جمالاً واقل إثارة من من غير الحجاب.. لأن الهدف منه حجب جمالك أصلاً! (إخفاؤه).. عايزة تظهري الجمال.. شيلي الطرحة وعادي على فكرة.. كوني راقية وجميلة كما تريدين.. وهتفضلي نفس البنت المؤدبة بس على الأقل متسقة مع نفسك! لكن لماذا "العك" عزيزتي؟
3- ترديد رجالنا الازدواجين تعليقات على النساء اللاتي يرتدين الحجاب الصحيح ب "الغفر" "يا ساتر يا رب" "اعوذ بالله".. إلخ.. ويعلق على الأجنبيات والمصريات ذوات الشعور الصفراء والحمراء والكيرلي ب"الموزز" "الن*****".. يابني أنت شخصياً شخص غير متسق مع ذاتك وعجيب على فكرة.. اصل أمك وأختك في البيت من غير الحجاب يبيقوا ستات وستات جامدين كمان.. بس أنت مصمم تعامل المحجبة كأنها وحشة مش واحدة اختارت تغطي "تحجب" جمالها.. وكمان اللي انت بتعلق على صورهم واسمهم موزز دول مش هاتحب "ستاتك" يلبسوا زيهم.. فانت بتعمل ايه في البنات بقي؟.. تخليهم يكرهوا نفسهم ويدخلوا في صراع نفسي جبار.. بين أنها عايزة تثبت أنها حلوة.. وبين أنها عايزة تختار مين يشوف جمالها ومين لأ! ف أرجوك اعقل شوية واتسق!
4- تأنيب الضمير.. البنات كتير تتحجب عشان ضميرها مأنبها من كثر تعليقات الناس حولها.. مش هتتحجبي؟ انتي نظيفة أوي من حوه مش ناقصك غير ده بس.. هتتعلقي من شعرك في النار وابوكي هيتعذب معاكي.. انت مش قريبة من ربنا يمكن لو لبستيه تساعدي نفسك تقربيله.. ماعنديش اعتراض على ولا حاجة من دول.. بس مصيبة لما تلبسي الطرحة عشان تسكتيهم من غير اقتناع.. ولا تاخديه وسيلة لشئ تاني.. لأنه ببساطة الحجاب قرار بالجهاد.. لو مش قده اشتغلي على نفسك بعدين إلبسية ده أكرملك من الرقص على السلم بردو!
5- لو غصب عنك.. خلاص الكلام مع أهلك بقى.. ارجوكم أرجوكم.. افهموا يا آباء ويا أمهات أن عليكم النصيحة ولكنك لن تهدي من أحببت بالمظاهر ولبس الطرحة.. اتكلم مع بنتك أو مراتك وخلي القرار يجي منها بدل المصيبة اللي حصلت عشان نظرة حضرتك السطحية للعفة..
باختصار.. أنا حاسة أن الخلاط إللي إحنا فيه ده لازم يقف..
يا تكوني محجبة يا مش محجبة.. ماترقصيش على السلم أنتي كمان زي كل حاجة في البلد دي..
مالهاش لازمة الطرحة اللي هتخليكي تضيقي في لبسك وتحزقي في بنطلونك وتزودي في المكياج.. لأ شيليها وخليكي طبيعية.. مش مهم الناس تقول أيه عليكي.. المهم تعملي ما يعكس ما في داخلك.. حقيقة رغبتك.. ماتناقضيش نفسك.. وماتجيش على نفسك عشان خايفة من حكم اللي حواليكي.. ما فائدة أن يحترمك الناس وأنت تحتقرين نفسك؟
طريقة ملابسنا باتت تعكس ما نحن فيه من تخبط وجهل وضعف.. تعكس سطحية تفكيرنا وأفكارنا.. ارجعوا لأصل الأمور.. فالباطن دائما يأتي أولاً!
دمتم :)
ليست هناك تعليقات:
إرسال تعليق