رسالة الى امي

بهاء الدين بدوي


الأولة جوا الحشا بين الضلوع شيلتيني 
والتانية في طفولتي وفي صبايا رعيتيني
والتالتة أنا محتاج لك يامة ليه سيبتيني

الأولة جوا الحشا بين الضلوع شيلتيني 
وكنت جنين ..
والتانية في طفولتي وفي صبايا رعيتيني
 بكل حنين
والتالتة أنا محتاج لك يامة ليه سيبتيني
وأقول يامين 

الأولة إنتي .. والتانية إنتي ..
والتالتة جنة ربنا مخلوقة ليكي انتي 

ياأخت هارون .. ياأم موسى .. ياالسيدة زينب
يابنت سيدنا النبي .. ياأم الحسن والحسين 
يامدد الأمومة الساري في كل زمان ومكان
يارحمة الرحمن .. يانفحة الحنان ..

منين أجيب الكلام اللي يوفيكي
 وفين ألاقي الحنان اللي ملا عينيكي 
حسيت مرارة اليتم والغربة بعديكي 
أمي يانبع حنان روحي في شوق ليكي
دي جنة الرحمن من تحت قدميكي 

حضرة نبينا الحبيب وصانا برضاكي 
وتعم بركة وخير .. بسر دعواكي ..
أمي يابحر الحب .. ضميني بايديكي
إشتقت ليكي كتير .. وفين ألاقيكي

أشكي لمين الأنين ولمين أبوح بالنوح
وأنا اللي وقت النوى كنت أشتكي ليكي
ومنين أجيب لي حبيب ومين يضاهيكي
بكيت ياامي كتير .. وبدمعي بأرثيكي
لو الدموع حتفيد .. بحور ماتكفيكي
ومهما طال الزمان .. أبداً ماحنساكي

نور إبتسامتك ياغالية .. نور محياكي
 كانت ابتسامة الرضا .. شمعة خطاويكي
ياصابرة ع الأيام .. الله يجازيكي .. 

ياما صبرتي سنين .. ولا حد حاسس بيكي
مديتي للمساكين .. بالخير أياديكي
وجمعتي شمل بيوت .. الله يحييكي 
خليتي كل الناس .. حتى اللي بلا احساس
والله حبوكي .. 

ياللي زرعتي في روحي .. الروح والريحان
ياللي سكنتي في قلبي .. والعقل والوجدان
أهون عليكي ياغالية .. تفوتيني للأحزان
 والله بعدك ياأمه .. إضيقت الجدران 

مين ليا يواسيني في غربة الأزمـان
وعزايا إنك ياطاهرة في جنة الرضوان ..

-->