كل الحكاية ...من مؤلفات الشاعر المصرى سمير احمد القط

كل الحكاية انى بعشقك
زى الحياة بلا منتهاه
فيكى السعادة كلها
فيكى النعيم منُها
فيكى ابتسامتى
لما ايامى
تقولى آه
كل الحكاية انى دايب
زى كل العاشقين
واحلف يمين
انك ملكتى كل شئ
وانى الغريق
وانت الرفيق اللى انتظرته
طول العمر بالشوق والحنين
كل الحكاية انى زى كل الطير
تعبه الهجير
ونفسه يلقى العش
اللى يسكنه مايكون اسير
كل الحكاية انى شفت
لون الدنيا بالوان الزهور
والضلمه نور
وانت كأنك شمس
سكنت جوه قلبى
ف عرش الملوك
زى الحسان
زى الاميرة اللى
زانت فى المكان
والريح عطور
كل الحكاية انى ودعت
جراح السنين ومات الانين
بين آيادى طبطبت
على صدر عانى
من ظلم السنين
ونزف دموع داقت مرار
فى الانتظار لقلب طيب
زى قلب العارفين
كل الحكاية انى بعشقك