مع طلعة
الفجر الجديد
جايلك انا
فارس جديد
جاى لك من الزمن البعيد
اتكحلى
بالليل وحطى فى العيون
صورة الوليد
الفجر جايلك
من جديد
شايل هموم
الكون على كتافه العتيقه
وقلبه نابض بالحياه
راسم على كل الجباه شكل الأمل
من طلة النور السعيد
اتزوقى .. واتجملى
علشان عريسك الجديد
حطى ف شفايفك
نقطة من دم الشهيد
وعيونك العسلية تتلون -
بقضبان من حديد
والتاج على راسك يكون
مصنوع من الدمع اللى فايض م العيون
لمى الغصون وابنى لى بيت
من بهجة القمح الجميل وفروع زتون
وانا جاى لك اليوم اخطبك
واعلن على الدنيا الزفاف
واروى بعبير القلب
بطن الارض من بعد الجفاف
ونحط قبل المغربية
نهايه لسنين العجاف
زفى الخبر خلى العصافير تبتهج
وتطير ترفرف فى السما
انا جاى وكلى ابتهاج
لا يهمنى ريح الشقا
ولا رمل محدوف من عجاج
ولا صوت رصاص الموبوئين بالسلطنة
جايلك انا
ياأحلى حته حنينه
0 تعليقات:
إرسال تعليق