كدابمخادع
باكرهك
ولا عمرى تانى هاصدقك
لملم خيوط العتمة من –
قلبك ياليل
وارحل بقه
خلّـــى النهار
يملى السما بالشقشقة
ويدفى قلب المجروحين
مابقتشى اخاف من غربتى
اذا شدّ حر الشمس حيله وهدّنى
ولا ضربة الشمس العفية
ورقدتى كيف العليل
فالشمس مهما استأسدت –
على ريم فؤادى .. ضيّهـــا -
واضح وضوح الحب فى عيون -
العذارى والولاد
لا الكدب لــوّن قرصها
ولا خشّ جوه ف أرضها
سهم العناد
ستّــار ياليل
على كل شىء
البانجو أصبح أكسجينك –
والدعارة قبلتك !!
اغسل ايديك
من دم كل المخدوعين
فى محبتك
وارحل بقه
ملعون ياليل
ملعون حنينى لقعدتك
ملعونه حتى –
اللسعة من برد الشتا
ان كتفتنى ف عتمتك
واغتالت الشوق والشقا
بطّلت أقول الشعر فيك
بطلت أجمّل كلمتى
واوصف عينيك
بطلت حتى النوم فى اّخر رحلتك
ولا عاد هايشجينى القمر
ان جانى يضحك –
فى انتباهى وغفلتك
ياه .. ياه .. عليك
ازاى قدرت تجمع العشاق -
فى حبّك وانت وكر المجرمين
ازاى خدعت أبو الفوارس – عنتره –
روميو
وقيس
وخدعت كل المغرمين ؟!
وازاى أنا
صدقت همسك للحنين
ووصفت فيك سحر العيون ؟!
ياه .. ياه .. عليك
د انا كل يوم
كنت انتظر كده بالساعات
على رمل شط البحر –
مستنى الغروب
والشمس بتلملم خيوطها اللى ابتدت
ترسم ملامحك ع الوشوش
وتشد كل شعاع حزين
اندس فى لوحة الحياه
وف لحظة يخطفها الغروب
يتلون الكون بالصفار
وتسيب لنا
لوحة الحياه
من غير رتوش
أفرح قوى
واختار رصيف مدسوس بعيد
واستنى جيّــة حضرتك
متخفّــى من خلف البيوت
وف حته فاضيه من الزمن
نرسم أنا وانت الأمل
تانى من جديد
من نور عنيك
وارسمها تانى من جديد
من غير وهن
واما ابتدى المرض اللعين
يسحب ويشرب نور عنيك
كنت افتديك
واعطيك من الدم الحنون
واتاريك بتلعب لعبتك
علشان تخيّــم ع الدعاره والدّخان
وتلم كل المجرمين
فى محبّــتك
ياه .. ياه .. ياليل
كداب
مخادع
باكرهك
ولاعمرى تانى هاصدقك
ملعون ياليل
0 تعليقات:
إرسال تعليق